Universal Declaration of Human Rights

Universa Deklara de plu Homi Privilegi

Ante-dice

Ka u logi de geneti valu e de plu eqa e fisika privilegi de holo homi famili es u basi de: libe, justi, paci lo Geo,

Ka no-kura e odio de plu homi privilegi dona plu seqe de plu sadi aktivi; qi pa sti koleri u menta de plu homi, e u proto de Geo; lo qi panto homi debi habe: libe de dice e kredi, libe ab fobo e ab minus de plu nece ra; qi gene deklara homo maxi boni volu de panto komuni homi,

Ka id habe nece; si plu homi ne gene kausa de reakti - per fini mode - per no-krati anti sadi e opresi, plu homi privilegi debi habe imuni per lega arki,

Ka id habe nece; sti ma mega plu matura de plu ami relatio inter panto natio,

Ka plu demo de plu ge-Unio Natio pre tena kredi de plu basi homi privilegi per Proto Papira de mu, de plu valu de homi persona, e de plu eqa privilegi de panto andro e gina, e pre face decide; sti ma boni plu komuni konditio e bio-tem per ma mega libe,

Ka panto mero-natio pre dice promise; gene - per kon-ergo ko plu ge-Unio Natio - ma boni stato de universa honora pro e kura de plu homi privilegi e basi libe,

Ka u komuni logi de panto-ci privilegi e libe habe maxi importa pro ple face de u-ci promise,

So

U Generali Grega,

Dice deklara; u-ci Universa Deklara de plu Homi Privilegi es u komuni norma de perfekti pro panto demo e panto natio, pro tende; panto persona e panto societa organi; qi du tena u-ci Deklara per menta, debi tenta sti ma mega un honora de plu-ci privilegi e libe per sko e eduka, e tena imuni plu universa e veri logi e reakti per dura natio e inter-natio metri, inter plu demo de panto mero-natio auto, e inter plu demo de plu tera de arki de se.

Mero 1

Panto homi gene nati libe e eqa de valu, e de plu privilegi. Mu habe plu privilegi de logi e menta, e debi akti ad alelo per sibi spiritu.

Mero 2

Panto homi habe panto privilegi e libe; ge-dice per u-ci Deklara, minus difere, homo: demo-speci, derma-kroma, sexu, lingua, religio, politika alo difere este, natio alo societa proto, plu proprie, nati alo difere stato. Plus-co nuli difere debi gene face de politika, lega alo inter-natio basi de natio alo tera; lo qi u persona habe eko, si id habe auto-krati, reakti-stato, ze-auto-krati alo reakti a difere arki limita.

Mero 3

Panto homi habe privilegi de: bio-tem, libe, persona imuni.

Mero 4

Nuli homi debi es ge-tena per dulo stato alo konditio. Plu dulo stato e dulo negoti debi gene sto akorda panto mode.

Mero 5

Nuli homi debi gene algo-puni alo plu sadi, no-liberali alo non-honora aktivi alo puni.

Mero 6

Panto homi habe privilegi de es u persona akorda lega panto-lo.

Mero 7

Panto homi habe eqa stato akorda lega, e habe privilegi minus odio de eqa lega imuni. Panto homi habe privilegi de eqa imuni anti panto ant-este; qi habe non-akorda kon u-ci Deklara, e anti panto stimula a tali ant-este.

Mero 8

Panto homi habe privilegi de funktio solve per plu tekno natio tribuna kausa plu aktivi; qi es anti plu basi privilegi; ge-dona a pe per plu natio lega.

Mero 9

Nuli homi debi gene akti ex minus-elekti kapti, tena in alo bali ex natio.

Mero 10

Panto homi habe privilegi akorda eqa de justi e publika tribuna per auto-arki e neutra-kredi tribuna de lega decide de plu privilegi e debi de se, e de krimi etio anti se.

Mero 11

1. Panto homi; ge-dice; akti krimi, habe privilegi de habe non-etio, a-kron ge-face habe etio akorda plu lega tem publika tribuna; lo qi pe habe panto promise; nece pro lega imuni.

2. Nuli homi debi habe etio de krimi kausa aktivi alo minus; qi ne pa es krimi akorda natio alo inter-natio lega; kron id gene akti. Plus-co u ma severi puni ne debi gene akti, de puni; qi es, kron u krimi pa gene akti.

Mero 12

Nuli homi debi gene minus-lega impedi de: no-publika bio-tem, famili, persona domi alo dice, alo plu etio anti honora alo famo de se. Panto homi habe privilegi de imuni ex plu lega anti plu tali impedi e etio.

Mero 13

1. Panto homi habe privilegi de libe de kine e eko-lo in plu limita de natio de se.

2. Panto homi habe privilegi de kine ex panto natio, klu de se, e de kine versi natio de se.

Mero 14

1. Panto homi habe privilegi de tenta detekti e habe asilu ab opresi lo plu difere natio.

2. Pe ne pote habe u-ci privilegi, si plu etio; qi veri gene okasio ex plu no-krati krimi alo ex plu aktivi; qi habe kontra anti plu tende e lega de plu ge-Unio Natio.

Mero 15

1. Panto homi habe privilegi de civi de mo natio.

2. Nuli homi debi lose civi stato de natio de se minus lega decide, alo ne habe privilegi de muta de civi stato de se.

Mero 16

Plu matura andro e gina habe privilegi de gene game e de proto famili minus limita de: demo, natio, religio. Mu habe plu eqa privilegi de game tem game e kron fini de id.

2. Plu game debi gene face solo per plu libe e ple akorda ex bi tende game-pe.

3. U famili es u fisika e basi unita de societa, e habe privilegi de imuni per societa e natio.

Mero 17

1. Singu homi habe privilegi de habe proprie pro se e pro plu difere homi.

2. Nuli homi debi lose proprie de se minus lega decide.

Mero 18

Panto homi habe privilegi de: libe de idea, kredi, religio. U-ci privilegi habe plus libe de muta de religio alo kredi, plus - per solo se alo ko plu difere homi ex grega - libe de monstra religio alo kredi de se per: plu sko, praxi, adora, reakti.

Mero 19

Panto homi habe privilegi de kredi e dice. U-ci privilegi habe plus libe de este plu kredi minus impedi, e de cerka, gene e dice de plu info e idea per komunika, e minus kura de natio limita.

Mero 20

1. Panto homi habe privilegi de libe de paci grega e societa.

2. Nuli homi debi es in societa per dina.

Mero 21

1. Panto homi habe privilegi de aktivi ko krati de natio de se, minus alo per plu libe-ge-elekti krati-pe.

2. Panto homi habe privilegi de eqa uti de plu publika servi lo natio de se.

3. U volu de plu civi debi es basi de krati arki. U-ci volu debi gene dice per plu kron-a-kron e veri elekti; qi debi es per universa e eqa elekti, e debi gene akti per no-publika elekti alo per plu homo libe elekti mode.

Mero 22

Panto homi, iso societa mero-pe, habe privilegi de societa imuni, e habe privilegi de habe plu: valuta, societa e gru privilegi; nece de persona valu e libe matura de persona de se, per natio tenta e inter-natio kon-ergo, e akorda sistema e habe-ra de natio de se.

Mero 23

1. Panto homi habe privilegi de: ergo, libe elekti de ergo, plu justi e favo konditio de ergo, imuni anti minus-ergo.

2. Panto homi habe privilegi de eqa ergo valuta pro eqa ergo minus odio.

3. Panto homi; qi akti ergo, habe privilegi de justi e favo valuta; qi sti sura; pe es de persona homi valu pro se e famili de se, e de plu plus-ra - si nece - per plu difere mode ex societa imuni.

4. Panto homi habe privilegi de face plu ergo grega pro imuni de plu kura de se.

Mero 24

Panto homi habe privilegi de laxa e libe tem ab ergo, klu plu sofi limita de ergo tem, e de plu kron-a-kron festa di kon ergo valuta.

Mero 25

Panto homi habe privilegi de norma stato de bio-tem; sati pro sani e boni de se e famili de se, klu de plu: vora-ma, vesti, eko-do, medika kura, ge-nece societa servi, privilegi de imuni; si: minus ergo, pato, soma defekti, minus game-an, paleo tem, alo plus minus de bio-pote tem plu konditio extra auto-krati.

2. Fe-parenta- e infanti-tem habe privilegi de idio kura e auxi. Panto infanti; si habe nati ex alo ne ex game, debi habe iso societa imuni.

Mero 26

1. Panto homi habe privilegi de plu sko. Plu sko debi es minus valuta debi a civi, mini tem plu proto e basi alti. Plu proto sko debi habe fo-nece. Plu tekno sko debi habe generali posi, e plu ma tekno sko debi habe posi a panto-pe akorda sko profito.

2. Plu sko debi gene dona a ple matura de homi persona, e a stimula resista un honora de plu homi privilegi e basi libe. Mu debi sti ma boni: logi, tolera, ami qalita inter panto natio, demo alo religio grega, e debi sti difusi plu ergo de plu ge-Unio Natio pro auxi de paci.

3. Plu parenta habe proto privilegi de elekti de speci de plu sko; qi gene dona a plu infanti de se.

Mero 27

1. Panto homi habe privilegi de: akti ko plu more festa de societa, gene profito de plu arti, habe mero de plu skience profito e boni ra.

2. Panto homi habe privilegi de imuni pro plu gru e profito kura; qi es plu seqe ex: skience, grafo alo arti face; de qi pe es face-pe.

Mero 28

Panto homi habe privilegi de societa e inter-natio sistema; per qi plu privilegi; ge-fixa in u-ci Deklara, pote gene ple veri.

Mero 29

1. Panto homi habe plu debi a societa; solo lo qi u matura de persona habe posi.

2. Panto homi debi reakti solo a plu limita; ge-decide per lega, solo tende face sura u gru logi e honora de plu privilegi e libe de plu difere homi, e de aktivi akorda plu justi debi de gru publika ordina e generali boni lo demo-krati societa.

3. Panto-ci privilegi e libe lice habe praxi kontra plu tende e lega de plu ge-Unio Natio per nuli mode.

Mero 30

Nuli-ra ex u-ci Deklara lice gene logi tende sti; u natio, grega alo homi habe privilegi de aktivi alo akti per ra; ge-tende pro destru de plu privilegi e libe; ge-fixa in id.